"Ngati wina wake anatipanga chipongwe atikhululukire" - Nkunika

Mphunzitsi watimu ya Jenda United wati tsopano akukanika kumvetsa chimene chikuvuta kutimuyi kuti igonje masewero onse amu NBS Bank National Division League mpaka wapempha kuti ngati anachitidwa chipongwe amwakhululukire.

Uchizi Nkunika amayankhula kutsatira kugonja 2-1 ndi timu ya Ndirande Stars lachiwiri ndipo wati zikusowetsa mtendere kuti timu ikumamenya bwino komabe kukanika kupambana.

"Nzovuta kukamba kwake chifukwa tikumenya chimodzimodzi koma osayenda. Ngati pali wina anatipanga chipongwe atikhululukire Koma ngati zili zakwa Mulungu tipambana ndipo matimu onse awa tidzawaswa." Anatero Nkunika.

Iye wanenetsa kuti timu yake situluka mu ligiyi ndipo chaka cha mawa iseweranso mu ligiyi koma wadandaula kuti oyimbira akuononga mpira kwambiri mu ligiyi.

Timuyi ili pa nambala 12 mu ligiyi opanda point iliyonse pomwe yagonja kasanu ndi kanayi mu ligiyi.

"Jenda siyituluka mu ligi" - Nkunika

Mphunzitsi watimu ya Jenda United, Uchizi Nkunika, wanenetsa kuti timu yake situluka mu ligi ya NBS Bank National Division angakhale kuti agonja mmasewero asanu ndi amodzi omwe asewera mu ligiyi.

Iye anayankhulapo kutsatira kusachita bwino kwa timuyi yomwe sinapezeko point angakhale imodzi koma Iye wati timuyi imenyerabe nkhondo mpaka ipeze chipambano choyamba chomwe chitsegulire mwayi kutimuyi.

"Tilimbikirabe kuti mwina nkupezako chipambano choyamba zikatero ndekuti chikhala chiyambi cha zabwino. Sitituluka mu ligi, masewero akadalipo ochuluka ndipo tilimbikirabe mpaka tidzafike kumtundako." Anatero Nkunika.

Mphunzitsiyu watsogolera timuyi mu masewero awiri okha poti analowa mmalo mwa Obvious Banda yemwe anachotsedwa Kamba kosachita bwino mmasewero anayi.

Jenda yagonja ndi Bangwe All Stars, Mitundu Baptist, Namitete Zitha, FOMO FC, Ntaja United komanso Baka City ndipo ili pansi penipeni pa nambala 12 opanda point.

Wolemba : Hastings Wadza Kas

Timu ya Jenda United yomwe imasewera mu ligi ya NBS NATIONAL DIVISION LEAGUE yaimitsa ntchito mphunzitsi wamkulu wa timuyi a Obvious Banda.

Malingana ndi timuyi yati yachita izi kusatira kusachita bwino Kwa timuyi pomwe yagonja masewero atatu omwe yasewera.

Ndipo timuyi yati tsogolo la mphunzitsi lidziwika bwino akulu akulu a timuyi akakumana.