"OYIMBIRA AMATUKWANA ZA MKABUDULA" - NDOLO

Mphunzitsi watimu ya Changalume Barracks, Davie Ndolo, wati ndi wokhumudwa ndi oyimbira pa masewero awo ndi Extreme kamba koti wathandizira kuti agonje komanso amatukwana osewera.

Iye amayankhula atatha masewero omwe agonja 3-0 pa bwalo la Owen Malijani ku Mchinji ndipo akukhulupilira kuti oyimbira watenga gawo lalikulu kuti agonje.

"Ziganizo zambiri zinali zokomera anzathuwo basi chomwe amafuna ndi kuti atibalalitse komanso anamutukwana kaputeni wathu za mkabudula nde zisamakhale chonchi chifukwa kumeneku ndiye kupha mpira," anafotokoza Ndolo.

Komabe iye wati ali ndi timu yabwino kwambiri yomwe ikungofunikira kukonza mavuto omwe akumana nawo kenako ayamba kuchita bwino.

Tsopano timuyi yagonja mu masewero awo awiri onse mu ligi ndipo ali pansi penipeni opanda point iliyonse mu ligi ya NBS Bank National Division.

Bornfacecharles633@gmail.com

3:1

NKHANI

Timu ya FCB Nyasa Big Bullets itumiza osewera awo a zaka zosadutsa 17 Ku mpikisano wa mdziko la Zambia womwe timu ya Kafue Celtic ukuchititsa.

Izi zadziwika ndi lipoti ya mtolankhani wodziwika bwino mu dzikolo, Kaumba Chikenge.

Ena mwa matimu omwe atenge nawo mbali mu mpikisanowu ndi monga Zambia U-17 Select, Ascent Soccer Academy ya ku Malawi komanso matimu ena aku DRC ndi Zimbabwe akhale akuyitanidwanso.

Timu ya Kafue Celtic ikuchititsa masewerowa ndi cholinga chifukwa kupeza osewera atsopano omwe ndi aluso koma ali achisodzera.

SILVER YAKHUTIRA NDI POINT IMODZI

Timu ya Silver Strikers yati masewero awo ndi Mighty Wanderers tsopano ayamba kukhalano ovuta kamba koti chaka chatha ankangolepherana komabe akhutira ndi point imodzi koyenda.

Wachiwiri kwa mphunzitsi watimuyi, Mapopa Msukwa, ndiye wanena izi kutsatira kuti alepherana 1-1 ndi Wanderers pa bwalo la Zomba.

Iye anati timu yake inasewera bwino mu chigawo chachiwiri koma akananika kugwiritsa ntchito mipata yomwe anapeza.

"Chigawo chachiwiri tinabwera osinthika ndipo tikanatha kugoletsa komabe kupeza point koyenda sizinaipe kwambiri ndipo takhutira," anatero Msukwa.

Kutsatira kupeza point imodziyi, Silver tsopano yafika pa mapoints khumi (10) mu ligi atapambana katatu, kufananitsa mphamvu kamodzi ndi kugonjanso kamodzi.